SERMON 1 TESALONIKA 4:13-18

PANGHIRIMON NA MANONGTONG I. PAMUHAI Panghirimon ni Huria na parjolo i diharoro ni Jesus na magira ma ro mambahahen nasida togu jala hot di haporseaonna nang pe ingkon dipaburuburu jala ingkon mangadopi tekanan nasida. Suang songoni ma sai margurasa jala sungkun-sungkun di roha nasida taringot tu angka sisolhotna naung marujung ngolu hape haroro ni Kristus na paduahalihon i pe dang ro do pe. Ala marragam do angka poda na mangerbang diluat i, taringot tu hamateoan; isarana ma i di horong ni ugama na leban mandok; ndang adong be sihirimon molo dung mate; horong ni Aeskhilus mandok molo nungga mate jolma ndang adong be haheheon, horong ni Teokritus mandok panghirmon adong holan diangka jolma na mangolu do, molo dung mate jolma ndang adong be panghirimonnna; jala Katullus mandok hatiha sinondangta parsatongkinan on mintop, ro ma borngin saleleng-lelengna dung ingkon tarpodom hita, gabe sisoada nama i jala holan siingoton ni angka na mangolu so pola sihirimon be i mulak mangolu muse dihangoluan sogot.angka poda i ma mambahen marsak roha nasida marningot angka na hinaholongan nasida naung jumolo monding. Dihatiha roha na sai marsak jala na sai sungkun-sungkun i ma ro si Paulus mangalehon alus dohot panorangion tu nasida taringot tu hamatean dohot hangoluan sisalelenglelengna. II. HATORANGAN NI TURPUK 1. Unang Arsakhon Angka Naung Monding i. Marsak do halak Kristen na di Tessalonik ala so diboto nasida songon dia muse angka na jumolo monding di haroro ni Kristus i. Naeng manghabit angka naung monding i do nian rohana. Ai boha do nasida muse di haroro ni Tuhan i, gabe luangan ma nasida? Alai dialusi si Paulus ma nasida asa unang marsak taringot tu angka naung monding i. Ai godang do jolma pasarihu tu angka naung monding. Ai boi do memang habishabisan arta ni hita jolma manarihon na monding, didok nasida asa sangap na monding i, ai tutu do gabe sangap angka naung monding? Sasintong na ndada holan si Paulus be na paingothon hita taringot tu na so ringkot arsakhonon angka naung monding. Pamanat ma pandok ni Buku Parjamita 9: 5-6: Ai anggo halak na mangolu i diboto do na ingkon mate nasida sogot, alai anggo halak naung mate ndang diboto agia aha jala ndang adong be di nasida parjambaran (Jambar sian na marrumang diportibi)…” ndang disoadahon Jesus realitas ni hamatean. Ai ndang boi so ro hamatean, ingkon boluson ni saluhut jolma do i; porsea manang so porsea pe ibana. Alai alani Kristus, gabe parsatongkinan nama hamatean i, dunghon hamonangan ni Kristus manaluhon hamatean i. asa molo digombarhon adong hamatean na parjolo (secara fisik), adong muse hamatean sisaleleng ni lelengna, nanaeng dohononna ndang tarhahua ni hamatean i be angka na porsea i. ai molo porsea hita naung mate dohot hehe Kristus, sandok togihonon ni Debata do rap dohot Jesus nang angka naung monding marhitehite Ibana (Ay 14). Astuanna nungga patar hamonangan ni Jesus maralohon hamatean. Atik pe sipata huaso ni hamatean i tuk dope manghuphupi mata ni jolma i asa unang dibereng be angka sihirimon dibagasan Jesus i, jala asa lam ganda biar ni roha ni jolma tu hamatean (isaran ma i tarida do biar ni hita jolma marnida hamatean marhite panghataion molo manaringoti tu namate, sai dipangke “Sattabi Jabuon”) . molo dihalak na porsea di Jesus Kristus; mandok dibagasan Haporesaonna godang dope sihirimon dibalik ni hamatean i (Psal 16:9-11; Job 19:25-27). Jala didok do “ai na tuat ma Tuhan i sian banua ginjang mardongan surak-surak, marsoara ma raja ni surusuruan, tarbege ma sarune ni Debata. Dung i hehe ma jumolo angka na mate di bagasan Kristus (ayat 16). 2. Ndang Sumurung Na Mangolu Sian Angka Naung Monding Ala naung hehe Kristus sian na mate, jala Ibana do patumonaan ni haheheon ni angka na mate (1 Kor. 15: 20), laos togihononNa do sandok angka naung monding marhitehite Ibana. Adong dua rahasia na naeng idaonta dison. Parjolo: Angka na porsea di Tuhan Jesus, ndang magopo ngoluna, alai rap dohot Kristus do nasida. Ai didok do “…jala mate pe hita, mate di Tuhan i do (Rom 14: 8). Paduahon: Ndang sumurung halak na mangolu sahat ro di haroro ni Kristus i sian angka na parjolo monding andorang so haroroNa i dope. Tutu masijoloanan mate, alai di Tuhan i sarupa do angka na porsea di Ibana. Tanggungjawab ni na mangolu manarihon dirina dohot donganna na mangolu do. 3. Rap Do Muse Angka Na Porsea Di Tuhan i. Di na ro Tuhan i, mardongan suraksurak do i, i ma soara ni raja surusuruan ( Bnd. Dan. 12: 1). Manghuling muse sarune ni Debata (Mat. 24: 31, didok laos angka surusuruan i do marsarune). Tujuan ni suraksurak manang soara i, i ma laho manghehe angka naung monding i do, ai “….gabe hehe ma angka naung monding i tu hatongtongon” ninna si Paulus di 1 Korint 15: 52. Asa parjolo do saotik perhatian tu nasida sian tu angka na mangolu dope. Asa ndang magopo angka na porsea di Kristus i naung jumolo mate. Salpu i pe asa diarahon perhatian tu angka na mangolu dope. Holan i, ndang pola hitungan jam lelengna ai tompu di bagasan sanghidop mata do i sude, dung dipahehe naung mate i, laos ihut do angka na mangolu i dipauba tu hatongtongon (bnd. 1 Kor. 15: 52-53). Angkup ni i digombarhon Apostel Paulus do nang taringot tu angka na mangolu di ari haroro ni Kristus i (ayat 17), didok ibana hita na mangolu dope , tubu do pingkiran na mandok na dirajumi Apostel Paulus do ujui hamamasa ni ari ni Tuhan i uju dipartingkian ni ngoluna. Mangalusi pingkiran on adong dua hal na ingkon taparrohahon. Naparjolo ndang hea dipabotohon apostel Paulus andingan haroro ni Tuhan i (bindu 5:1-2), napaduahon, dihirim roha ni apostel Paulus do hamamasa ni ari i uju dihatiha ni ngoluna. 4. Masiapulan Ma Hita Naeng ma masiapulan hita na mangolu, tu hita sandiri naung umbotosa, ndang sai marsak be hita, ndang ingkon sai lao be pingkiran tu angka na monding. Boi do hatiha i sedang berduka hita jolma ala monding keluargana, alai nang so tingki i pe sai lehonon do hatorangan, isarana na mambahen sira tu na monding, ndang sai tingki di hamondingan patorangkon i, ala olo do gabe gurgar acara siala ni i. Manang ndang sira i tanda ni parsirangan; songon i muse dohot na sai manangianghonsa. Ala ni i, tongtong ma masiapulan hita ai ndang marhasurungan na mangolu sian na mate di Tuhan i. III. SIHANGOLUHONONHON  Asa tangkas hita berjuang mangarade diri. Manomunomu secara aktif, rumang ni halak na marlojongi dompak garis finish, loja, sai hera naeng mangulon , maima-ima sadia leleng nari. Unang pedem hita laos tarpodom alai lohot ma di hita panghirimon mandok hehe do sude angka naung mate diharoro ni Tuhan Jesus na paduahalihon. Ima tahaposi asa margogo hita mangadopi sude na masa di ngolu on.  Ndang adong be hubungan ni na mangolu dohot na mate, manang ise na sai mambahen parsaoran tu na mate, hagigian ni Debata do i (5 Musa 18:11-12; Jes 8; Jes 19; 1 Sam 28:8-14), tapadao ma i sian dirinta. Unang be sai dipanghulungi na mate (isarana; sai manghorasi ma sahalam tu hami pinomparmon dll). Tatadinghon ma haporseaon ni angka ompunta najolo taringot tu na mate i. tahaporseai ma, na hehe do nasida muse raphon hita angka na porsea. Ai dung sae ngolunta sian tano on, dung mate hita jala ditanom, ndang marujung disi langkanta. Alai na hehe do hita muse rap dohot sude angka na porsea di Jesus Kristus (Pat. Hata Haporseaon ponggol paduahon). Hehe do muse pamatanghon, sian tanoman on; suang mangolu bahenon ni Tuhanku., sai masipaidaan do na porsea i, dung sahat be langkana tu hasonangan i, (Pat Mark 12:18-27)  Nungga tingkina tasungguli rumang ni angka hamatean na aktual na masa di ngolu siganup ari andorang so songgop hamatean na ginoaran ni turpuk on. Pinomat gabe bohal di hita laho manghilalahon paboa naung bahat rumang ni hamatean na boi jumpang hita jala manahopi hita andorang so mate, jala dalanta mangarade ma on manomunomu haroro ni Tuhanta, dohot masiapulan sama hita. Hamatean na tumangkas nuaeng, i ma hamatean ni Partondion, hamatean ni haporseaon, hamatean ni roha holong, jala rumang ni hamatean sisongon on produktif patupa ragam ni hamatean songon na pinatupa ni angka teroris na masa di pudian ni ari on. Hamatean ni panghilalaan dohot hamatean ni pri kemanusiaan dipangke pamatehon torop halak. Jala ditonga tonga ni Huria sinuaeng pe nungga jotjot masa hamatean na songoni, isarana ma i na masa di HKBP Kayu Tinggi, HKBP Garu 8 Medan, dohot angka lan na asing boasa boi masa i alusna mangolu alai mate. Ima pangontak ni revolusi industri 4.0 dohot era digital nuaeng on jumpang hita do sada hamatean na tung mansai jorbut situtu i ma na margoar hamatean ni panghilalaan-perhatian dohot kepedulian (kematian kultur refleksi). On ma sada tantangan na umbolon na ingkon hamonanghononta di Huria, rumatangga, inganan parkarejoan, nang bangso. Nungga lam so haidaan be rasa peduli ni jolma maradophon donganna dohot na humaliangna. Goarna do media sosial alai na masa justru rumang ni pangalaho na asosial. Ndang holan di masyarakat dohot parsaoran ni Weyk, lunggu, manang sektor ni Huria (Pandita tu parhalado, parhalado tu pandita, ruas tu pandita/parhaladona), alai nungga bongot nang dittonga-tonga ni keluarga. Sipata ndang rosu be parsaoran ni ama tu ina, songon i ianakon tu natoras ala sala mangauhon kemajuan ni teknologi si nuaeng. Asa molo mamuhai turpuk on dipaingot apostel Paulus do hita taringot tu arsak ni roha, unang mangandungi hita taringot tu hamatean songon pangandung ni halak na so marpanghirimon, udut tu si denggan ma nang dipartingkian nuaeng, jamot hita, asa unang gabe parsidohot hita gabe agen-agen ni hamatean na imbaru, di era jual beli kematian na masa sinuaeng on. Amen